ਦੁਨੀਆਂ ਵਿੱਚ ਜਦੋਂ ਤੋਂ ਆਨਲਾਈਨ ਆਣਪ੍ਰਦਾਨ ਹੋਇਆ ਹੈ ਉਦੋਂ ਤੋਂ ਲੈ ਕੇ ਸਾਈਬਰ ਅਪਰਾਧ ਵਿੱਚ ਵਧਾ ਹੋਇਆ ਹੈ । ਸਾਈਬਰ ਅਪਰਾਧ ਦਿਨ-ਬ-ਦਿਨ ਵਧਦਾ ਜਾ ਰਿਹਾ ਹੈ। ਇਸ ਤਰ੍ਹਾਂ ਦੇ ਅਪਰਾਧ ਨੂੰ ਅੰਜ਼ਾਮ ਦੇਣ ਵਾਲੇ ਕਈ ਗਰੋਹ ਅਤੇ ਵਿਅਕਤੀ ਐਕਟਿਵ ਹਨ। ਇਸ ਵਿਚਕਾਰ ਹੀ ਚੰਡੀਗੜ੍ਹ ਵਿੱਚ ਇੱਕ ਗਰੋਹ ਦਾ ਪਰਦਾਫਾਸ਼ ਹੋਇਆ ਹੈ। ਦੱਸ ਦੇਈਏ ਕਿ ਚੰਡੀਗੜ੍ਹ ਪੁਲਿਸ ਦਾ ਸਾਈਬਰ ਅਪਰਾਧ ਇਨਵੈਸਟੀਗੇਸ਼ਨ ਸੈੱਲ ਅਜਿਹੇ ਮਾਮਲਿਆਂ ਵਿੱਚ ਲਗਾਤਾਰ ਅਪਰਾਧੀਆਂ ਨੂੰ ਫੜ ਰਿਹਾ ਹੈ। ਸੈੱਲ ਨੇ ਅਜਿਹੇ ਹੀ ਇੱਕ ਮਾਮਲੇ ਵਿੱਚ ਮੁਲਜ਼ਮ ਨੂੰ ਗ੍ਰਿਫ਼ਤਾਰ ਕੀਤਾ ਹੈ।
ਦਰਅਸਲ, ਇਹ ਮਾਮਲਾ 1.53 ਕਰੋੜ ਰੁਪਏ ਦੀ ਵੱਡੀ ਧੋਖਾਧੜੀ ਨਾਲ ਸਬੰਧਤ ਹੈ। ਦੋਸ਼ੀ ਸੀਨੀਅਰ ਸਿਟੀਜ਼ਨ ਨਾਲ 7 ਸਾਲ ਤੱਕ ਠੱਗੀ ਮਾਰਦਾ ਰਿਹਾ। ਸਾਲ 2021 ਵਿੱਚ ਬਜ਼ੁਰਗ ਨੂੰ ਇਸ ਗੱਲ ਦਾ ਅਹਿਸਾਸ ਹੋਇਆ ਅਤੇ ਉਸਨੇ ਪੁਲਿਸ ਨੂੰ ਸ਼ਿਕਾਇਤ ਕੀਤੀ। ਸੈਕਟਰ 34 ਥਾਣੇ ਵਿੱਚ ਪਿਛਲੇ ਸਾਲ 28 ਅਗਸਤ ਨੂੰ ਧੋਖਾਧੜੀ ਦੀਆਂ ਧਾਰਾਵਾਂ ਤਹਿਤ ਕੇਸ ਦਰਜ ਕੀਤਾ ਗਿਆ ਸੀ। ਫੜੇ ਗਏ ਮੁਲਜ਼ਮ ਦੀ ਪਛਾਣ 28 ਸਾਲਾ ਵਿਪੁਲ ਸੋਨੀ ਵਾਸੀ ਮੁੰਡੀ ਖਰੜ, ਮੁਹਾਲੀ ਵਜੋਂ ਹੋਈ ਹੈ। ਇਹ ਕੇਸ ਸੈਕਟਰ-34 ਦੇ ਸਾਧੂ ਸਿੰਘ ਨਾਂ ਦੇ ਵਿਅਕਤੀ ਨੇ ਦਰਜ ਕਰਵਾਇਆ ਸੀ। ਸੂਤਰਾਂ ਮੁਤਾਬਕ ਦੋਸ਼ੀ ਨੂੰ ਇਕ ਵਾਰ ਹੈਦਰਾਬਾਦ ਤੋਂ ਵੀ ਗ੍ਰਿਫਤਾਰ ਕੀਤਾ ਗਿਆ ਸੀ।
ਸ਼ਿਕਾਇਤਕਰਤਾ ਅਨੁਸਾਰ ਉਸ ਨੇ ਰਵੀ ਮਿਸ਼ਰਾ, ਕਮਲੇਸ਼ ਕੁਮਾਰ, ਪ੍ਰਦੀਪ ਕੁਮਾਰ, ਵਿਮਲ ਦੂਬੇ, ਅੰਕਿਤ ਮਿਸ਼ਰਾ, ਐੱਫ.ਆਰ.ਡੀ.ਆਈ., ਇੰਡੀਅਨ ਕਲੱਬ, ਸੀ.ਵੀ. ਸਰਵਿਸਿਜ਼, ਐਡਵੈਂਚਰ ਮਾਰਟ ਇੰਡੀਆ, ਐੱਸ. ਸ਼ਤਾਕਿਸ਼ ਸਰਵਿਸ, ਸਟੈਂਡਰਡ ਸਰਵਿਸਿਜ਼ ਅਤੇ ਸਨਸ਼ਾਈਨ ਸਰਵਿਸ ਵੱਲੋਂ ਉਸ ਨਾਲ ਧੋਖਾ ਕੀਤਾ ਗਿਆ। ਉਸ ਨੇ ਸਿਆਣੇ ਹੋਣ ਦਾ ਬਹਾਨਾ ਲਾ ਕੇ ਆਪਣੀ ਪਾਲਿਸੀ ਨਾਲ ਠੱਗੀ ਮਾਰੀ ਸੀ। ਪੁਲੀਸ ਅਨੁਸਾਰ ਇਹ ਗਰੋਹ ਫਰਜ਼ੀ ਨਾਵਾਂ ’ਤੇ ਧੋਖਾਧੜੀ ਦੀਆਂ ਵਾਰਦਾਤਾਂ ਨੂੰ ਅੰਜਾਮ ਦਿੰਦਾ ਸੀ।
ਰਵੀ ਮਿਸ਼ਰਾ ਨੇ ਖੁਦ ਨੂੰ ਪੈਸੇ ਵੰਡਣ ਵਿਭਾਗ ਦਾ ਕਰਮਚਾਰੀ ਦੱਸਿਆ ਹੈ। ਇਸ ਦੇ ਨਾਲ ਹੀ ਸ਼ਿਕਾਇਤਕਰਤਾ ਨੂੰ ਕਿਹਾ ਕਿ ਉਹ ਉਨ੍ਹਾਂ ਦੀ ਪਾਲਿਸੀ ਨੂੰ ਦੇਖ ਰਿਹਾ ਹੈ। ਸ਼ਿਕਾਇਤਕਰਤਾ ਨੇ ਉਸ ‘ਤੇ ਭਰੋਸਾ ਕੀਤਾ। ਰਵੀ ਮਿਸ਼ਰਾ ਅਤੇ ਬਾਕੀ ਮੁਲਜ਼ਮਾਂ ਨੇ ਉਸ ਨੂੰ ਐਫਆਰਡੀਆਈ, ਇੰਡੀਅਨ ਕਲੱਬ, ਸੀਵੀ ਸਰਵਿਸਿਜ਼, ਐਡਵੈਂਚਰ ਮਾਰਟ ਇੰਡੀਆ, ਸ਼ਤਾਕਿਸ਼ ਸਰਵਿਸ, ਸਟੈਂਡਰਡ ਸਰਵਿਸਿਜ਼ ਅਤੇ ਸਨਸ਼ਾਈਨ ਸਰਵਿਸ ਦੇ ਬੈਂਕ ਖਾਤਿਆਂ ਵਿੱਚ 1.53 ਕਰੋੜ ਰੁਪਏ ਜਮ੍ਹਾਂ ਕਰਾਉਣ ਦਾ ਝਾਂਸਾ ਦਿੱਤਾ। ਰਵੀ ਮਿਸ਼ਰਾ ਨੇ ਸ਼ਿਕਾਇਤਕਰਤਾ ਨੂੰ ਕਿਹਾ ਕਿ ਜੇਕਰ ਪੈਸੇ ਟਰਾਂਸਫਰ ਨਾ ਕੀਤੇ ਗਏ ਤਾਂ ਸਾਰੇ ਪੈਸੇ ਖਤਮ ਹੋ ਜਾਣਗੇ।
ਪੁਲਿਸ ਖੋਲ੍ਹੇਗੀ ਰਾਜ਼
ਜਾਣਕਾਰੀ ਮੁਤਾਬਕ ਇਹ ਘੁਟਾਲਾ ਮੁਲਜ਼ਮਾਂ ਵੱਲੋਂ ਸਾਲ 2014 ਵਿੱਚ ਸ਼ੁਰੂ ਕੀਤਾ ਗਿਆ ਸੀ ਅਤੇ ਸਾਲ 2020 ਤੱਕ ਜਾਰੀ ਰਿਹਾ। 2021 ਵਿੱਚ, ਸ਼ਿਕਾਇਤਕਰਤਾ ਨੂੰ ਅਹਿਸਾਸ ਹੋਇਆ ਕਿ ਉਸ ਨਾਲ ਭਾਰੀ ਧੋਖਾ ਹੋਇਆ ਹੈ। ਜਿਸ ਤੋਂ ਬਾਅਦ ਉਸ ਨੇ ਪੁਲਸ ਨੂੰ ਸ਼ਿਕਾਇਤ ਦਿੱਤੀ। ਇੰਸਪੈਕਟਰ ਹਰੀ ਓਮ ਸ਼ਰਮਾ ਅਤੇ ਉਨ੍ਹਾਂ ਦੀ ਟੀਮ ਨੇ ਬਾਰੀਕੀ ਨਾਲ ਜਾਂਚ ਕਰਨ ਤੋਂ ਬਾਅਦ ਮੁਲਜ਼ਮ ਨੂੰ ਗ੍ਰਿਫ਼ਤਾਰ ਕਰਕੇ ਉਸ ਦਾ 4 ਦਿਨ ਦਾ ਰਿਮਾਂਡ ਲੈ ਲਿਆ ਹੈ। ਮਾਮਲੇ ‘ਚ ਉਸ ਦੇ ਬਾਕੀ ਸਾਥੀਆਂ ਅਤੇ ਇਸ ਤਰ੍ਹਾਂ ਦੀਆਂ ਹੋਰ ਵਾਰਦਾਤਾਂ ਬਾਰੇ ਜਾਣਕਾਰੀ ਹਾਸਲ ਕੀਤੀ ਜਾ ਰਹੀ ਹੈ।