PUNJAB
INDIA
WORLD
ਵਿਧਾਇਕ ਅੰਮ੍ਰਿਤਪਾਲ ਸਿੰਘ ਸੁਖਾਨੰਦ ਨੇ ਵੀਡੀਓ ਜਾਰੀ ਕਰਕੇ ਸਰਪੰਚ ਦੇ ਹੋਏ ਕਤਲ ਨੂੰ ਲੈਕੇ ਖੋਲੇ ਰਾਜ
ਮੋਗਾ ਜ਼ਿਲ੍ਹੇ ਅੰਦਰ ਆਉਂਦੇ ਬਾਘਾਪੁਰਾਣਾ ਸ਼ਹਿਰ ਵਿੱਚ ਬੀਤੇ ਦਿਨ ਹੈਪੀ ਸਰਪੰਚ ਨਾ ਦੇ ਵਿਅਕਤੀ ਦਾ ਦਿਨ ਦਿਹਾੜੇ ਗੋਲੀਆਂ ਮਾਰ ਕਤਲ ਕਰ ਦਿੱਤਾ ਗਿਆ ਸੀ। ਉਸ ਤੋਂ ਬਾਅਦ ਪਰਿਵਾਰ ਅਤੇ ਸਰਪੰਚ ਦੀ ਦੋਸਤ ਲੜਕੀ ਨੇ ਮੀਡੀਆ ਸਾਹਮਣੇ ,ਆਪਣੇ ਪਤੀ ਮਨਪ੍ਰੀਤ ਸਿੰਘ ਅਤੇ ਉਨ੍ਹਾਂ ਦੇ ਪਰਿਵਾਰਕ ਮੈਂਬਰਾਂ ਉਪਰ ਕਤਲ ਕਰਨ ਵੱਡੇ ਆਰੋਪ ਲਗਾਏ ਸੀ। ਜਿੰਨਾ ਵਿੱਚ ਬਾਘਾਪੁਰਾਣਾ ਦੇ ਵਿਧਾਇਕ ਅੰਮ੍ਰਿਤਪਾਲ ਸਿੰਘ ਦਾ ਕਤਲ ਕਰਨ ਵਿੱਚ ਸਾਥ ਦੇਣ ਦਾ ਇਲਜ਼ਾਮ ਲਗਾਇਆ ਗਿਆ । ਉਸ ਤੋਂ ਬਾਅਦ ਸ਼ਾਮ ਅੱਠ ਵਜੇ ਦੇ ਕਰੀਬ ਪਰਿਵਾਰ ਅਤੇ ਜੀਰਾ ਦੇ ਸਾਬਕਾ ਕਾਂਗਰਸੀ ਵਿਧਾਇਕ ਕੁਲਬੀਰ ਸਿੰਘ ਜ਼ੀਰਾ ਨੇ ਬਾਘਾਪੁਰਾਣਾ ਦੇ ਭਗਤ ਸਿੰਘ ਚੌਕ ਵਿੱਚ ਧਰਨਾ ਲਗਾ ਦਿੱਤਾ ਗਿਆ। ਥੋੜੇ ਸਮੇਂ ਬਾਅਦ ਸ਼੍ਰੋਮਣੀ ਅਕਾਲੀ ਦਲ ਬਾਦਲ ਦੇ ਸੀਨੀਅਰ ਆਗੂ ਤੀਰਥ ਸਿੰਘ ਮਾਹਲਾ ਵੀ ਆਪਣੇ ਸਮਰਥਕਾਂ ਨਾਲ ਧਰਨੇ ਤੇ ਬੈਠ ਗਏ। ਉਨ੍ਹਾਂ ਵੱਲੋ ਮੰਗ ਕੀਤੀ ਜਾ ਰਹੀ ਸੀ ਕਿ ਹਲਕਾ ਵਿਧਾਇਕ ਅੰਮ੍ਰਿਤਪਾਲ ਸਿੰਘ ਸੁਖਾਨੰਦ ਅਤੇ ਕਤਲ ਕਰਨ ਵਾਲੇ ਲੋਕਾਂ ਤੇ ਪਰਚਾ ਦਰਜ਼ ਕੀਤਾ ਜਾਵੇ। ਚੌਕ ਵਿੱਚ ਲੱਗੇ ਧਰਨੇ ਦੌਰਾਨ ਸ਼ਹਿਰ ਦੇ ਲੋਕ ਇਕੱਠੇ ਹੋ ਗਏ ਸਨ। ਰਾਹਗੀਰ ਲਗਾਤਾਰ ਪ੍ਰੇਸ਼ਾਨ ਹੋਣ ਲੱਗੇ,ਉਸ ਮੌਕੇ ਰਾਹਗੀਰ ਧਰਨਾ ਕਾਰੀਆਂ ਨਾਲ ਉਲਝਦੇ ਵੀ ਨਜ਼ਰ ਆਏ। ਉਨ੍ਹਾਂ ਦਾ ਕਹਿਣਾ ਸੀ, ਧਰਨਾ ਥਾਣੇ ਦੇ ਦਰਵਾਜ਼ੇ ਤੇ ਲਗਾਓ, ਸਾਨੂੰ ਕਿਉਂ ਖਰਾਬ ਕੀਤਾ ਜਾ ਰਿਹਾ ਹੈ।
ਜਦੋਂ ਧਰਨੇ ਸਬੰਧੀ ਡੀਐਸਪੀ ਦਲਬੀਰ ਸਿੰਘ ਨਾਲ ਗੱਲ ਕੀਤੀ ਤਾਂ ਉਨ੍ਹਾਂ ਦੱਸਿਆ ਕਿ ਪੀੜਤ ਪਰਿਵਾਰ ਦੇ ਅਸੀ ਬਿਆਨ ਦਰਜ਼ ਕਰ ਲਏ ਹਨ,ਪਰ ਇਹ ਮੰਗ ਕਰ ਰਹੇ ਹਨ ਕਿ ਵਿਧਾਇਕ ਦਾ ਨਾਮ ਪਰਚੇ ਵਿੱਚ ਪਾਇਆ ਜਾਵੇ। ਡੀਐਸਪੀ ਮੁਤਾਬਕ ਜਦੋਂ ਉਨ੍ਹਾਂ ਪੀੜਤ ਪਰਿਵਾਰ ਤੋਂ ਵਿਧਾਇਕ ਦੀ ਸ਼ਮੂਲੀਅਤ ਬਾਰੇ ਕੋਈ ਸਬੂਤ ਮੰਗਿਆ ਤਾਂ ਉਨ੍ਹਾਂ ਵੱਲੋਂ ਕੋਈ ਸਬੂਤ ਨਹੀਂ ਦਿੱਤਾ ਜਾ ਰਿਹਾ ਹੈ। ਆਖਰਕਾਰ ਰਾਤ ਦੇ 12 ਵਜੇ ਕਰੀਬ ਪੁਲਿਸ ਵੱਲੋਂ ਪਰਿਵਾਰ ਨੂੰ ਧਰਨਾ ਚੱਕਣ ਲਈ ਮਨਾ ਲਿਆ ਗਿਆ ,ਤੇ ਇੱਕ ਐਫ ਆਈ ਆਰ ਦੀ ਕਾਪੀ ਧਰਨਾ ਕਾਰੀਆਂ ਨੂੰ ਦੇ ਦਿੱਤੀ ਗਈ।ਜਿਸ ਤੋਂ ਬਾਅਦ ਧਰਨਾ ਚੱਕ ਦਿੱਤਾ ਗਿਆ।
ਤੁਹਾਨੂੰ ਦੱਸ ਦੇਈਏ
ਧਰਨੇ ਦੌਰਾਨ ਕੁੱਝ ਲੋਕਾਂ ਵੱਲੋਂ, ਕੁਲਬੀਰ ਸਿੰਘ ਜ਼ੀਰਾ ਦੀ ਸ਼ਮੂਲੀਅਤ ਨੂੰ ਲੈਕੇ ਚਰਚਾ ਕੀਤੀ ਜਾ ਰਹੀ ਸੀ, ਕਿ ਜ਼ੀਰਾ ਦਾ ਸਰਪੰਚ ਨਾਲ ਕੀ ਰਿਸ਼ਤਾ ਹੈ। ਕਿਉਂਕਿ ਆਮ ਲੋਕਾਂ ਨੂੰ ਇਹ ਪਤਾ ਸੀ ਕਿ ਸਰਪੰਚ ਹਲਕਾ ਨਿਹਾਲ ਸਿੰਘ ਵਾਲਾ ਵਿੱਚ ਪੈਂਦੇ ਪਿੰਡ ਪੱਤੋ ਹੀਰਾ ਸਿੰਘ ਦਾ ਰਹਿਣ ਵਾਲਾ ਹੈ,ਪਰ ਨਾ ਕੋਈ ਨਿਹਾਲ ਸਿੰਘ ਵਾਲਾ ਤੋਂ ਕਾਂਗਰਸੀ ਆਗੂ ਆਇਆ ਹੈ ਤੇ ਨਾ ਹੀ ਕੋਈ ਬਾਘਾਪੁਰਾਣਾ ਤੋਂ ਕਾਂਗਰਸੀ ਧਰਨੇ ਵਿੱਚ ਪਹੁੰਚਿਆ, ਜਦੋਂ ਅਸੀਂ ਕਾਂਗਰਸ ਦੇ ਇੱਕ ਸੀਨੀਅਰ ਲੀਡਰ ਨਾਲ ਧਰਨੇ ਨਾ ਪਹੁੰਚਣ ਬਾਰੇ ਪੁੱਛਿਆ ਤਾਂ ਉਸ ਨੇ ਆਖਿਆ ਕਿ ਪੁਲਿਸ ਆਪਣੇ ਲੈਵਲ ਤੇ ਕਾਰਵਾਈ ਕਰ ਰਹੀ ਹੈ।ਇਸ ਕਰਕੇ ਅਸੀਂ ਕਿਸੇ ਧਰਨੇ ਦੀ ਕੋਈ ਕਾਲ ਨਹੀਂ ਦਿੱਤੀ। ਜਦੋਂ ਕੁਲਬੀਰ ਸਿੰਘ ਜ਼ੀਰਾ ਦੀ ਧਰਨੇ ਵਿੱਚ ਸ਼ਮੂਲੀਅਤ ਬਾਰੇ ਪੁੱਛਿਆ ਤਾਂ ਉਸ ਨੇ ਆਖਿਆ ਕਿ ਜ਼ੀਰਾ ਦੀ ਪਰਸਨਲ ਕੋਈ ਲਿਆਜ ਹੋ ਸਕਦੀ ਹੈ,ਇਸ ਲਈ ਉਹ ਧਰਨੇ ਪਹੁੰਚੇ ਹੋਣ। ਜਦੋਂ ਮੀਡੀਆ ਵੱਲੋਂ ਜੀਰਾ ਨੂੰ ਚੌਂਕ ਵਿੱਚ ਧਰਨਾ ਲਗਾਉਣ ਸਬੰਧੀ ਅਤੇ ਉਨ੍ਹਾਂ ਦੀ ਪਾਰਟੀ ਦੇ ਕਿਸੇ ਆਗੂ ਦਾ ਨਾ ਆਉਣ ਬਾਰੇ ਪੁੱਛਿਆ ਤਾਂ ਜ਼ੀਰਾ ਨੇ ਸਵਾਲ ਨੂੰ ਟਾਲਦਿਆਂ ਆਖਿਆ ਕਿ ਚੰਡੀਗੜ੍ਹ ਵਿੱਚ ਬਾਜਵਾ ਸਾਬ ਨੇ ਗੱਲ ਕੀਤੀ ਸੀ,ਇਸ ਕਰਕੇ ਮੈਂ ਚੰਡੀਗੜ੍ਹ ਤੋਂ ਸਿੱਧਾ ਬਾਘਾਪੁਰਾਣਾ ਚੌਕ ਵਿੱਚ ਕੇ ਧਰਨੇ ਤੇ ਆ ਕੇ ਬੈਠ ਗਿਆ ਹਾਂ।
ਵਿਧਾਇਕ ਨੇ ਵੀਡੀਓ ਜਾਰੀ ਕਰਕੇ ਦਿੱਤੀ ਸਫਾਈ
ਇਸ ਘਟਨਾ ਤੋਂ ਬਾਅਦ, ਬਾਘਾ ਪੁਰਾਣਾ ‘ਆਪ’ MLA ਅਮ੍ਰਿਤਪਾਲ ਸਿੰਘ ਸੁਖਾਨੰਦ ਨੇ ਆਪਣੇ ਅਧਿਕਾਰਿਤ ਅਕਾਉਂਟ ਉੱਤੇ ਵੀਡੀਓ ਜਾਰੀ ਕਰਦਿਆਂ ਇਸ ਕਤਲ ਮਾਮਲੇ ਨੂੰ ਲੈ ਕੇ ਖੁਲਾਸੇ ਕੀਤੇ ਹਨ। ਉਨ੍ਹਾਂ ਨੇ ਸਰਪੰਚ ਹੈਪੀ ਦੇ ਕਤਲ ਉੱਤੇ ਦੁੱਖ ਜਤਾਇਆ। ਉਨ੍ਹਾਂ ਕਿਹਾ ਕਿ, “ਮੈਂ ਹੈਪੀ ਦੇ ਪਰਿਵਾਰ ਅਤੇ ਉਸ ਦੀ ਧਰਮ ਪਤਨੀ ਨਾਲ ਦੁੱਖ ਦਾ ਪ੍ਰਗਟਾਵਾ ਕਰਦਾ ਹਾਂ। ਪਰ ਇਸ ਵਿਚਾਲੇ ਕਾਂਗਰਸ ਵੱਲੋਂ ਖਾਸ ਕਰਕੇ ਸੁਖਪਾਲ ਖਹਿਰਾ ਅਤੇ ਸੀਨੀਅਰ ਅਕਾਲੀ ਆਗੂ ਬਿਕਰਮ ਮਜੀਠੀਆ ਵਰਗਿਆਂ ਨੇ ਪੂਰੀ ਸਿਆਸਤ ਖੇਡੀ ਹੈ।”ਇਹ ਇੱਕ ਪਰਿਵਾਰਿਕ ਕਲੇਸ਼ ਦਾ ਮਾਮਲਾ ਹੈ। ਜਿਸ ਮੁੰਡੇ ਉੱਤੇ ਕਤਲ ਦੇ ਇਲਜ਼ਾਮ ਹਨ, ਉਹ ਮਨਪ੍ਰੀਤ ਸਿੰਘ ਉਰਫ ਬਬਲੂ ਹੈ। ਜਿਸ ਮੁੰਡੇ ਦਾ ਕਤਲ ਹੋਇਆ ਹੈ, ਉਹ ਸਰਪੰਚ ਹਰਵਿੰਦਰ ਸਿੰਘ ਉਰਫ਼ ਹੈਪੀ ਹੈ। ਵੀਡੀਓ ਵੀ ਸਾਹਮਣੇ ਆਈ ਜਿਸ ਵਿੱਚ ਇੱਕ ਕੁੜੀ ਬੋਲ ਰਹੀ ਹੈ, ਉਹ ਰੁਪਿੰਦਰ ਕੌਰ ਹੈ, ਜੋ ਕਿ ਮਨਪ੍ਰੀਤ ਸਿੰਘ ਉਰਫ਼ ਬਬਲੂ ਦੀ ਪਤਨੀ ਹੈ। ਉਹ ਖੁਦ ਮੰਨੀ ਹੈ ਕਿ ਉਹ ਹੈਪੀ ਨਾਲ ਲਿਵ-ਇਨ-ਰਿਲੇਸ਼ਨਸ਼ਿਪ ਵਿੱਚ ਰਹਿ ਰਹੀ ਹੈ। ਆਪਣੇ ਪਤੀ ਨੂੰ ਛੱਡ ਕੇ ਪਿਛਲੇ ਇੱਕ ਸਾਲ ਤੋਂ ਹੈਪੀ ਨਾਲ ਰਹਿ ਰਹੀ ਸੀ। ਇਸ ਕਰਕੇ ਮਨਪ੍ਰੀਤ ਸਿੰਘ ਬਬਲੂ (ਰੁਪਿੰਦਰ ਅਤੇ ਹੈਪੀ) ਇਨ੍ਹਾਂ ਨੂੰ ਜਾਨੋਂ ਮਾਰਨ ਦੀਆਂ ਧਮਕੀਆਂ ਦਿੰਦਾ ਸੀ। ਇਹ ਮਾਮਲਾ ਥਾਣੇ ਵੀ ਕਈ ਵਾਰ ਪਹੁੰਚਿਆਂ। ਜਦੋਂ ਰੁਪਿੰਦਰ ਨੂੰ ਹੈਪੀ ਨਾਲ ਘੁੰਮਦੇ ਦੇਖਦਾ ਸੀ ਤਾਂ ਮਨਪ੍ਰੀਤ ਨੇ ਉਸ ਦਾ ਕਤਲ ਕੀਤਾ ਹੈ। ਮੈਂ ਇਸ ਮਾਮਲੇ ਦੋਵਾਂ ਧਿਰਾਂ ਨੂੰ ਵਿਧਾਇਕ ਹੋਣ ਵਜੋਂ ਸਮਝਾਇਆ ਵੀ ਸੀ ਪਰ ਇਨ੍ਹਾਂ ਦਾ ਮਾਮਲਾ ਹੱਲ ਨਹੀਂ ਹੋਇਆ, ਜਿਸ ਕਰਕੇ ਹੀ ਵਾਰਦਾਤ ਵਾਪਰੀ। ਇਸ ਘਟਨਾ ਦਾ ਸਿਆਸੀ ਨਾਤਾ ਨਹੀਂ ਹੈ। ਜੇਕਰ ਲੋੜ ਪਈ ਤਾਂ ਮੈਂ ਤਿੰਨਾ ਬਾਰੇ ਦੁਬਾਰਾ ਵੀ ਦੱਸ ਦੇਵਾਂਗਾ। ਇਸ ਵਿੱਚ ਕਿਸੇ ਨੂੰ ਰਾਜਨੀਤੀ ਨਹੀਂ ਖੇਡਣੀ ਚਾਹੀਦੀ।
ਪੁਲਿਸ ਨੇ ਕੀ ਕਿਹਾ?
ਡੀਐਸਪੀ ਦਲਵੀਰ ਸਿੰਘ ਨੇ ਦੱਸਿਆ ਕਿ, “ਮ੍ਰਿਤਕ ਹੈਪੀ ਅਤੇ ਕਤਲ ਕਰਨ ਵਾਲਿਆਂ ਦੀ ਨਿੱਜੀ ਦੁਸ਼ਮਣੀ ਸੀ। ਜਿਸ ਨੇ ਮਾਰਿਆ ਹੈ, ਉਸ ਦੀ ਪਤਨੀ ਅਤੇ ਮ੍ਰਿਤਕ ਹੈਪੀ ਦੇ ਆਪਸੀ ਸਬੰਧ ਸਨ। ਇਹ ਅਜੇ ਮੁੱਢਲੀ ਜਾਣਕਾਰੀ ਸਾਹਮਣੇ ਆਈ ਹੈ। ਬਾਕੀ ਮਾਮਲੇ ਦੀ ਜਾਂਚ ਜਾਰੀ ਹੈ। ਪਰਿਵਾਰ ਦੇ ਬਿਆਨਾਂ ਦੇ ਅਧਾਰ ਉੱਤੇ ਕਾਰਵਾਈ ਹੋਵੇਗੀ। ਹਮਲਾਵਰ ਫਾਰਚੂਨਰ ਗੱਡੀ ਵਿੱਚ ਆਏ ਸੀ, ਗੱਡੀ ਵਿੱਚੋਂ ਬਾਹਰ ਆ ਕੇ 3 ਨੇ ਫਾਇਰਿੰਗ ਕੀਤੀ ਹੈ। ਗੱਡੀ ਨੂੰ ਟ੍ਰੇਸ ਕੀਤਾ ਜਾ ਰਿਹਾ ਹੈ ਅਤੇ ਮਾਮਲੇ ਦੀ ਜਾਂਚ ਜਾਰੀ ਹੈ।”
ਦੂਜੇ ਪਾਸੇ ਅਜੇ ਹੈਪੀ ਸਰਪੰਚ ਦੇ ਪਰਿਵਾਰ ਵੱਲੋਂ ਸੰਸਕਾਰ ਨਹੀਂ ਕੀਤਾ ਗਿਆ।
