ਕਿਸਾਨਾਂ ਦੇ ਚੋਣ ਮਦਾਨ ਵਿੱਚ ਉਤਰ ਕੇ ਚੋਣਾਂ ਲੜਨ ਨੂੰ ਲੈ ਕੇ ਚੜੂਨੀ ਦੀ ਦਿੱਤੀ ਸਲਾਹ ਤੋਂ ਅਕਾਲੀ ਦਲ ਤੇ ਬੀਜੇਪੀ ਵਾਲੇ ਭੜਕੇ

ਦਿੱਲੀ :- ਹਰਿਆਣਾ ਦੇ ਕਿਸਾਨ ਆਗੂ ਗੁਰਨਾਮ ਸਿੰਘ ਚੜੂਨੀ ਨੇ ਪੰਜਾਬ ਦੇ ਕਿਸਾਨ ਆਗੂਆਂ ਨੂੰ ਵਿਧਾਨ ਸਭਾ ਚੋਣਾਂ ਲੜਨ ਦੀ ਸਲਾਹ ਦਿੱਤੀ ਹੈ। ਉਨ੍ਹਾਂ ਕਿਹਾ ਕਿ ਪੰਜਾਬ ਦੇ ਲੋਕ ਬਦਲਾਅ ਚਾਹੁੰਦੇ ਹਨ, ਇਸ ਲਈ ਪੰਜਾਬ ਦੇ ਕਿਸਾਨ ਆਗੂਆਂ ਨੂੰ ਚੋਣਾਂ ਲੜਨ ਲਈ ਅੱਗੇ ਆਉਣਾ ਚਾਹੀਦਾ ਹੈ। ਉਨ੍ਹਾਂ ਸਲਾਹ ਦਿੱਤੀ ਹੈ ਕਿ ਸੂਬੇ ਦੇ ਕਿਸਾਨ ਆਗੂ ਚੋਣਾਂ ਲੜ ਕੇ ਸਰਕਾਰ ਬਣਾਉਣ, ਕਿਉਂਕਿ ਸੂਬੇ ਦੇ ਲੋਕ ਇਹੀ ਚਾਹੁੰਦੇ ਹਨ। ਹੁਣ ਤੱਕ ਕਿਸੇ ਵੀ ਸਿਆਸੀ ਧਿਰ ਨੇ ਕਿਸਾਨਾਂ ਦੀ ਗੱਲ ਨਹੀਂ ਸੁਣੀ। ਉਧਰ, ਚੜੂਨੀ ਦੇ ਇਸ ਬਿਆਨ ਤੋਂ ਪੰਜਾਬ ਦੀਆਂ ਸਿਆਸੀ ਧਿਰਾਂ ਭੜਕ ਉਠੀਆਂ ਹਨ। ਭਾਜਪਾ ਆਗੂ ਹਰਜੀਤ ਗਰੇਵਾਲ ਨੇ ਕਿਹਾ- ‘ਮੈਂ ਤਾਂ ਪਹਿਲਾਂ ਹੀ ਕਹਿੰਦਾ ਸੀ ਇਹ ਅੰਦੋਲਨ ਸਿਆਸੀ ਹੈ, ਇਨ੍ਹਾਂ ਦਾ ਮਕਸਦ ਹੀ ਸਿਆਸਤ ‘ਚ ਆਉਣਾ ਸੀ’। ਸੰਯੁਕਤ ਮੋਰਚੇ ਨੇ ਜਾਣਬੁਝ ਕੇ ਚੜੂਨੀ ਤੋਂ ਇਹ ਅਖਵਾਇਆ ਹੈ। ਚੜੂਨੀ ਦੇ ਇਸ ਬਿਆਨ ਤੋਂ ਬਾਅਦ ਅਕਾਲੀ ਦਲ ਨੇ ਵੀ ਸਵਾਲ ਚੁੱਕੇ ਹਨ। ਚੋਣਾਂ ਵਾਲੇ ਬਿਆਨ ਤੋਂ ਭੜਕੇ ਅਕਾਲੀ ਆਗੂ ਵਿਰਸਾ ਸਿੰਘ ਵਲਟੋਹਾ ਨੇ ਕਿਹਾ- ‘ਪੰਜਾਬੀਆਂ ਦਾ ਅਰਬਾਂ ਰੁਪਿਆ ਤੇ ਇਨ੍ਹੀ ਤਾਕਤ ਲਵਾ ਕੇ ਜੇ ਚੋਣਾਂ ਹੀ ਲੜਨੀਆਂ ਹਨ ਤਾਂ ਫੇਰ ਲੋਕੀਂ ਗਾਲ੍ਹਾਂ ਹੀ ਕੱਢਾਣਗੇ।’