PUNJAB
INDIA
WORLD
ਅਮਰੀਕਾ ਵਿੱਚ ਪਿਛਲੇ ਦਿਨੀਂ ਫਲੋਰਿਡਾ ਵਿੱਚ ਪੰਜਾਬੀ ਟਰੱਕ ਡਰਾਈਵਰ ਨੇ ਵੱਲੋਂ ਗਲਤ ਯੂ ਟਰਨ ਕਰਨ ਕਰਕੇ, ਤਿੰਨ ਮੌਤਾਂ ਹੋ ਗਈਆਂ ਸਨ। ਜਿਸ ਤੋਂ ਬਾਅਦ ਅਮਰੀਕਾ ਨੇ ਵੱਡਾ ਫੈਸਲਾ ਲਿਆ ਹੈ। ਅਮਰੀਕਾ ਦੇ ਵਿਦੇਸ਼ ਮੰਤਰਾਲੇ ਨੇ ਵਪਾਰਕ ਟਰੱਕ ਚਾਲਕਾਂ ਲਈ ਵਰਕ ਵੀਜ਼ਾ ਜਾਰੀ ਕਰਨਾ ਤੁਰੰਤ ਪ੍ਰਭਾਵ ਨਾਲ ਰੋਕ ਦਿੱਤਾ ਹੈ। ਇਸ ਦੀ ਜਾਣਕਾਰੀ ਵਿਦੇਸ਼ ਮੰਤਰੀ ਮਾਰਕੋ ਰੂਬਿਓ ਨੇ ਆਪਣੇ ਸੋਸ਼ਲ ਮੀਡੀਆ ਅਕਾਊਂਟ ‘ਤੇ ਦਿੱਤੀ।
ਅਮਰੀਕੀ ਨਾਗਰਿਕਾਂ ਦੀ ਜਾਨ ਨੂੰ ਖਤਰਾ-ਵਿਦੇਸ਼ ਮੰਤਰੀ ਮਾਰਕੋ
ਵਿਦੇਸ਼ ਮੰਤਰੀ ਮਾਰਕੋ ਰੂਬਿਓ ਨੇ ਲਿਖਿਆ – ਤੁਰੰਤ ਪ੍ਰਭਾਵ ਨਾਲ ਅਸੀਂ ਵਪਾਰਕ ਟਰੱਕ ਚਾਲਕਾਂ ਲਈ ਸਾਰੇ ਵਰਕਰ ਵੀਜ਼ਾ ਜਾਰੀ ਕਰਨਾ ਰੋਕ ਰਹੇ ਹਾਂ। ਵਿਦੇਸ਼ੀ ਚਾਲਕਾਂ ਦੀ ਵਧਦੀ ਗਿਣਤੀ, ਜੋ ਅਮਰੀਕਾ ਦੀਆਂ ਸੜਕਾਂ ‘ਤੇ ਵੱਡੇ ਟਰੈਕਟਰ-ਟ੍ਰੇਲਰ ਟਰੱਕ ਚਲਾ ਰਹੇ ਹਨ, ਅਮਰੀਕੀ ਨਾਗਰਿਕਾਂ ਦੀ ਜਾਨ ਨੂੰ ਖਤਰੇ ਵਿੱਚ ਪਾ ਰਹੀ ਹੈ ਅਤੇ ਅਮਰੀਕੀ ਟਰੱਕ ਚਾਲਕਾਂ ਦੀ ਆਜੀਵਿਕਾ ਨੂੰ ਕਮਜ਼ੋਰ ਕਰ ਰਹੀ ਹੈ।
ਫਲੋਰਿਡਾ ਹਾਦਸਾ ਬਣਿਆ ਕਾਰਣ
ਪਿਛਲੇ ਹਫ਼ਤੇ ਫਲੋਰਿਡਾ ਵਿੱਚ ਇੱਕ ਵੱਡਾ ਹਾਦਸਾ ਹੋਇਆ ਸੀ। ਸੋਸ਼ਲ ਮੀਡੀਆ ‘ਤੇ ਆਏ ਵੀਡੀਓ ਵਿੱਚ ਦਿਖਾਇਆ ਗਿਆ ਕਿ ਇੱਕ ਸੈਮੀ ਟਰੱਕ ਚਾਲਕ ਨੇ ਸੜਕ ‘ਤੇ ਅਚਾਨਕ ਗਲਤ ਤਰੀਕੇ ਨਾਲ Y-ਟਰਨ ਲਿਆ। ਉਸੇ ਸਮੇਂ ਸਾਹਮਣੇ ਤੋਂ ਆ ਰਹੀ ਮਿਨੀ ਵੈਨ ਟਰੱਕ ਦੇ ਪਿੱਛਲੇ ਹਿੱਸੇ ਨਾਲ ਟਕਰਾਈ ਅਤੇ ਬੁਰੀ ਤਰ੍ਹਾਂ ਉਸ ਦੇ ਹੇਠਾਂ ਫਸ ਗਈ।
ਇਸ ਦੁਰਘਟਨਾ ਵਿੱਚ ਮਿਨੀ ਵੈਨ ਚਲਾ ਰਹੇ 30 ਸਾਲਾ ਨੌਜਵਾਨ, ਉਸ ਦੇ ਨਾਲ ਬੈਠੀ 37 ਸਾਲਾ ਮਹਿਲਾ ਅਤੇ 54 ਸਾਲਾ ਆਦਮੀ – ਤਿੰਨਾਂ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ। ਹਾਦਸੇ ਦੀ ਭਿਆਨਕਤਾ ਦਾ ਅੰਦਾਜ਼ਾ ਇਸ ਗੱਲ ਤੋਂ ਲਗਾਇਆ ਜਾ ਸਕਦਾ ਹੈ ਕਿ ਵੈਨ ਬੁਰੀ ਤਰ੍ਹਾਂ ਟਰੱਕ ਦੇ ਹੇਠਾਂ ਦਬ ਗਈ ਸੀ।
ਗੈਰਕਾਨੂੰਨੀ ਇਮੀਗ੍ਰੈਂਟ ਹੈ ਦੋਸ਼ੀ
ਅਮਰੀਕੀ ਪੁਲਿਸ ਦੀ ਜਾਂਚ ਵਿੱਚ ਪਤਾ ਲੱਗਿਆ ਹੈ ਕਿ ਇਸ ਘਟਨਾ ਨੂੰ ਅੰਜਾਮ ਦੇਣ ਵਾਲਾ ਪੰਜਾਬੀ ਹਰਜਿੰਦਰ ਸਿੰਘ ਹੈ, ਜੋ 28 ਸਾਲ ਦਾ ਹੈ ਅਤੇ ਗੈਰਕਾਨੂੰਨੀ ਇਮੀਗ੍ਰੈਂਟ ਹੈ, ਜੋ ਪੰਜਾਬ ਤੋਂ ਅਮਰੀਕਾ ਪਹੁੰਚਿਆ ਸੀ। ਮੌਕੇ ‘ਤੇ ਪੁੱਜੇ ਪੁਲਿਸ ਅਧਿਕਾਰੀਆਂ ਨੇ ਸੜਕ ‘ਤੇ ਟਾਇਰਾਂ ਦੇ ਨਿਸ਼ਾਨ ਵੀ ਲੱਭੇ, ਜਿਸ ਨਾਲ ਸਾਫ਼ ਹੈ ਕਿ ਟਰੱਕ ਨੇ ਗੈਰਕਾਨੂੰਨੀ ਤਰੀਕੇ ਨਾਲ ਮੋੜ ਲੈਣ ਦੀ ਕੋਸ਼ਿਸ਼ ਕੀਤੀ ਸੀ।
ਟਰਾਂਸਪੋਰਟ ਇੰਡਸਟਰੀ ‘ਤੇ ਪੰਜਾਬੀਆਂ ਦਾ ਰਾਜ
ਇੱਕ ਅੰਕੜੇ ਅਨੁਸਾਰ ਅਮਰੀਕੀ ਹਾਈਵੇਅ ‘ਤੇ 30,000 ਤੋਂ ਵੱਧ ਪੰਜਾਬੀ ਟਰੱਕ ਡਰਾਈਵਰ ਹਨ, ਜੋ ਅਮਰੀਕਾ ਦੇ ਕੁੱਲ ਟਰੱਕ ਚਾਲਕਾਂ ਦਾ ਲਗਭਗ ਪੰਜਵਾਂ ਹਿੱਸਾ ਹੈ। ਇਹ ਗਿਣਤੀ ਲਗਾਤਾਰ ਵਧ ਰਹੀ ਹੈ। ਸਿੱਖ ਪੌਲੀਟੀਕਲ ਐਕਸ਼ਨ ਕਮੇਟੀ ਦੇ ਇੱਕ ਅਨੁਮਾਨ ਅਨੁਸਾਰ ਟਰੱਕਿੰਗ ਨਾਲ ਜੁੜੇ ਕੁੱਲ ਪੰਜਾਬੀਆਂ ਦੀ ਗਿਣਤੀ—ਜਿਨ੍ਹਾਂ ਵਿੱਚ ਜੌਬਰ, ਟਰੱਕਿੰਗ ਕੰਪਨੀਆਂ, ਟਰੱਕਿੰਗ ਸਕੂਲ, ਟਰੱਕ ਸਟਾਪ, ਟਰੱਕ ਵਾਸ਼ ਅਤੇ ਹੋਰ ਸ਼ਾਮਲ ਹਨ—ਲਗਭਗ 1,50,000 ਤੱਕ ਹੈ।
